La XDLA critica que les comparecencies sobre la reforma de la Llei de RTPA dexen de llau la cultura asturiana
posted by xdla
on Xue, 30/01/2014 - 18:01
Nel 2002, na tramitación de la llei vixente, participaron entidaes sociales y instituciones como l’Academia de la Llingua pa dar la so opinión sobre’l papel de los medios públicos na normalización del idioma
En payares del 2002, delles instituciones y entidaes de defensa de los derechos llingüísticos, como l’Academia de la Llingua Asturiana, el colectivu profesional Periodistes pol Asturianu y la Xunta pola Defensa de la Llingua Asturiana (XDLA) participaron na Comisión de Política Territorial de la Xunta Xeneral, onde se taba tratando sobre’l Proyectu de Llei de Medios de Comunicación Social. Hai que recordar que naquel momentu estes organizaciónes defendieron una televisión pública n’asturianu. Güei, 12 años depués, la realidá ye bien diferente: RTPA tien n’emisión menos del 5% de la so programación na llingua propia, anque sían los espacios que más audiencia tienen.
Dende’l nacimientu de la cadena, la XDLA y otres entidaes vienen esixendo un tratu dignu pal asturianu nes emisiones. Por eso, agora que va empezar a tramitase la Llei de RTPA nueva, esta organización entiende que ye’l momentu de qu’esta normativa recueya un compromisu claru de los medios públicos col idioma propiu. Sicasí, esti llunes van empezar les comparecencies sobre la reforma y nelles nun va participar nin l’Academia nin nenguna asociación cívica de defensa los derechos de los asturfalantes. Un precedente malu, sobre too teniendo en cuenta que los que tán dexando de llau a la xente que trabaya pola cultura asturiana -dalgo que tamién crea puestos de trabayu en sectores como la música, el teatru o la lliteratura- son los sos representantes políticos. De nada val reformar la llei si vemos que’l proyectu de televisión va siguir dando’l llombu a la cultura y la llingua d’esta tierra. Quier dicise, a la so xente, a la so audiencia.