La XDLA denuncia les partíes presupuestaries que nun va recibir la industria audiovisual asturiana pola falta d'oficialidá
posted by xdla
on Dom, 28/11/2021 - 14:29
La Xunta pola Defensa de la Llingua Asturiana (XDLA) denuncia que, pola falta d'oficialidá del asturianu, el nuestru idioma va quedar fuera de la Llei Audiovisual estatal nueva. Amás de dexar al asturianu ensin espaciu en plataformes como Netflix, HBO, Disney o Amazon, les productores d'esta tierra nun van poder acceder a les partíes presupuestaries que l'Estáu va crear pa fomentar la producción audiovisual nes llingües oficiales.
Esti martes anuncióse que la Llei Audiovisual va recoyer qu'un mínimu del 6 % de los conteníos de les plataformes prestadores de servicios audiovisuales per catálogu van tener que ser en gallegu, catalán o vascu. Amás, van tener qu'incluyir conteníos doblaos o subtitulaos a estos idiomes. Pa esto, van crease incentivos, como un impuestu del 5 % pa la producción audiovisual, del que'l 10 % va ser pa fomentar la producción audiovisual en llingües cooficiales.
Asturies, otra vuelta pola falta d'oficialidá, va perder la oportunidá de poder acceder a eses partíes. Too eso énte la pasividá del Gobiernu asturianu, que nun negoció col Gobiernu central o'l PSOE que la llei fixera referencia tamién a les llingües propies que nun son oficiales, como l'asturianu. Per otru llau, l'Executivu autonómicu mantién la reforma del Estatutu d'Autonomía paralizada, polo que la XDLA vuelve pidir a los grupos parllamentarios favorables a la reforma qu'entaínen col procesu pa que l'asturianu sía oficial enantes de la entrada en vigor de la Llei Audiovisual.
Hai que tener en cuenta que n'Asturies ta dexándose de llau la importancia de sectores como l'audiovisual y, sobre manera, la industria del doblaxe pa la normalización y normativización d'una llingua, amás del subtituláu nuna sociedá como l'asturiana ensin alfabetizar nel so idioma. Son munchos los puestos de trabayu que xeneraría una industria dedicada a esos menesteres.
Mentanto, TPA sigue marxinando los conteníos nel nuestru idioma nuna situación qu'incumple sistemáticamente la Llei d'Usu y la Llei de RTPA. Hai que recordar qu'una enmienda aprobada nel últimu Congresu de la FSA recueye que, mentes nun se reforme l'Estatutu, va fomentase la presencia de la llingua asturiana en RTPA desarrollando la Llei d'Usu.
Con too, TPA lleva ensin doblar conteníos al asturianu dende'l 2017 y nos últimos años emitió en navidá películes infantiles doblaes al castellanu en Madrid o Barcelona. Quier dicise, dedicó'l presupuestu a ufiertar los mesmos conteníos que yá se puen ver en televisiones como Clan, Boing, Neox o Cartoon Network. Ye'l momentu d'un cambiu y de tener accesu a conteníos audiovisuales de toa triba nel nuestru idioma, amás de crear puestos de trabayu gracies al sector audiovisual y l'asturianu. En Netflix tamién, pero sobre too en TPA, porque asina lo diz la llexislación que güei ta vixente ensin falta d'aprobar nenguna Llei Audiovisual.