La XDLA denuncia que los lletreros nuevos de la N-634 nun cumplen cola toponimia oficial
posted by xdla
on Xue, 18/05/2023 - 10:13
La Xunta pola Defensa de la Llingua Asturiana (XDLA) denuncia que los lletreros nuevos instalaos pol Ministeriu de Tresportes, Movilidá y Axenda Urbana na N-634 de la que pasa pel conceyu de Piloña nun cumplen cola toponimia oficial d'Asturies. Asina, nos cartelos nuevos puen vese topónimos como 'Campo de Caso', 'Infiesto' o Oviedo, en cuenta d'El Campu -única forma oficial dende 2007-, L'Infiestu -única forma oficial dende 2008- y Oviedo/Uviéu, denominación oficial de la capital d'Asturies dende'l 2019.
Pa la XDLA esto supón otru despreciu más de la Demarcación de Carreteres n'Asturies, de la Delegación del Gobiernu y del conxuntu del Executivu central hacia al patrimoniu llingüísticu asturianu. Too eso cola complicidá del Gobiernu d'Asturies, que s'enchipa de llograr que'l Ministeriu de Cultura publique dalgún cartelín n'asturianu xunto al restu d'idiomes del Estáu pol Día del Llibru, pero qu'asiente y agacha la cabeza mentes que dende Madrid refuguen cuestiones básiques pa la normalización como la especialidá docente d'asturianu o l'usu de la toponimia oficial d'esta tierra.
La Demarcación de Carreteres n'Asturies vien mostrando en cada oportunidá que tien el so despreciu hacia'l nuestru patrimoniu llingüísticu. Por eso, la organización reclama al Gobiernu d'Asturies, tanto dende la Dirección Xeneral de Política Llingüística como de la Comisión de Cartografia del Principáu y de la Viceconseyería d'Infraestructures Movilidá y Territoriu, una quexa formal a la Demarcación de Carreteres, a la delegada del Gobiernu n'Asturies, Delia Losa, y a la ministra de Tresportes, Raquel Sánchez, énte esti despreciu nuevu a la llexislación asturiana y, en conxuntu, a la cultura y la llingua d'Asturies.