La XDLA denuncia que'l porcentaxe d'emisión n'asturianu de RTPA pal 2021 va tar perbaxo del 1 %


La resolución de la "Convocatoria estraordinaria d’encargos de producción pa la promoción de la llingua asturiana y el gallego-asturianu" fecha pola Conseyería de Cultura, Política Llingüísticu y Turismu y RTPA escoyó siete proyectos. Mentanto, un total de 36 propuestes quedaron fuera d'esta convocatoria estraordinaria que Cultura dotó con 138.000 euros. La Xunta pola Defensa de la Llingua Asturiana (XDLA) quier denunciar qu'esto va representar que nel 2021 la RTPA dedique al asturianu namás que'l 0,85 % de la so emisión anual. Quier dicise, 4.475 minutos de 525.600 posibles.

Otra manera, los proyectos que queden fuera d'esta convocatoria estraordinaria sumaríen 1.000.000 d'euros de presupuestu, lo que val pa evidenciar la capacidá de producción n'asturianu y gallego-asturianu que tien el sector audiovisual y lo poco qu'en realidá s'apoyen les emisiones nes llingües propies dende la radiotelevisión pública.

Nel so momentu, la XDLA yá reclamó que los conteníos n'asturianu y gallego-asturianu que s'emiten en RTPA se cubran col so propiu presupuestu. Nun tien xacíu que la Conseyería de Cultura dedique una partida pa una radiotelevisión que yá recibe 23 millones d'euros de dineru público al traviés de la Conseyería de Presidencia y que, según diz l'Estatutu, la Llei d'Usu y la so llei de creación, tien que ser una ferramienta p'ayudar a normalizar l'asturianu y el gallego-asturianu.

A pesar d'esto, la dirección de RTPA, encabezada por Francisco Orejas, niégase a cumplir cola llexislación y actúa como si TPA y RPA fueren cadenes monollingües en castellanu. Nun cansamos de recordar qu’ensin el papel activu de la RTPA ye imposible que se cumplan eses frases que tanto repite'l Gobiernu de "salvar l’asturianu" y “recuperar l'arguyu de ser asturianu”. Depués d'añu y mediu de llexislatura, vemos que RTPA nun dedicó nin un euru del so presupuestu a producir conteníos n'asturianu a pesar de, repetimos, los 23 millones d'euros que tien de presupuestu.

Agora, con esta convocatoria, queden fuera de la parrilla del 2021 programes d'entretenimientu, deportivos, culturales y hasta series de ficción que diben tener l'asturianu como idioma vehicular. Agora toca saber si, dexando de llau esta convocatoria, RTPA va producir otros programes nuevos n'asturianu. Tampoco nun sabemos con qué criteriu s'escoyeron los proyectos, en qué midida van llegar a sectores estratéxicos pa la recuperación llingüística y si hai un compromisu de RTPA pa emitilos n'horarios afayadizos y con una promoción importante dientro de la cadena.