La XDLA pide persones comprometíes colos derechos llingüísticos na dirección de la RTPA

Énte la negociación inminente pa designar los xestores de la RTPA, la Xunta pola Defensa de la Llingua Asturiana (XDLA) recuerda a los grupos políticos que'l parllamentu salíu de les elecciones pasaes escoyó a Javier Fernández presidente cola condición, ente otres, de "incrementar la presencia de la llingua y la cultura asturianes" na radiotelevisión pública. Pa garantizar la execución d'esti compromisu parllamentariu, la XDLA demanda que los futuros xestores de la RTPA -director xeneral, Conseyu d'Alministración y Conseyu de Comunicación- sían persones comprometíes colos derechos llingüísticos. La organización cívica fai un llamamentu espresu a les formaciones polítiques qu'apostaron nos sos programes electorales por una RTPA al serviciu de la normalización llingüística -Podemos, IX y Foru- pa que trabayen con esti oxetivu.

La XDLA alerta de los riesgos de volver a apostar por equipos xestores hostiles a la llingua y la cultura propia como los d'estos primeros diez años d'existencia de los medios de comunicación públicos. Un exemplu d'esto ye la falta de pasos alantre daos dende'l 2007, porque dende que s'estrenaron (obligaos pola llexislación) los primeros espacios, les esperiencies nueves quedaron namás n'anécdota. Too esto pudo vese na programación del Día d'Asturies d'anguaño; mentes que nel 2014 llegó a emitise un 30% nel nuestru idioma, anguaño l'usu del asturianu quedó namás na repetición d'una película doblada que yá s'emitiera en xineru del 2015.

A pesar de lo que recueye l'alcuerdu d'investidura, nun hai pasos alantre en sectores claves como'l doblaxe -3 películes y una serie d'animación doblaes al asturianu nuna década, nenguna contratada esti añu-, tampoco nos informativos o nes retresmisiones deportives, a pesar de que l'usu esperimental del idioma propiu nestos formatos na Selmana de les Lletres nun xeneró nengún problema d'audiencies, sinón tolo contrario. Por eso, ye fundamental un cambiu nos xestores de la radio y la televisión pública, porque hasta'l momentu mostraron una incapacidá manifiesta pa echar a andar unos medios de comunicación públicos capaces a vertebrar social, cultural y llingüísticamente Asturies. Too ello a pesar de los sueldos más que curiosos, sacaos del bolsu de tolos ciudadanos, que lleven tolos meses.