La XDLA presenta un cantar y un videoclip como banda sonora de la manifestación pola oficialidá
La escena sonora asturiana nunca quedó de brazos cruciaos nel so compromisu cola llingua d'esta tierra. Dende hai décades, la música vien siendo un preséu fundamental nel procesu de normalización de la llingua asturiana y los cantantes y músicos asturianos usaron la so voz y soníos pa reivindicar la oficialidá, yá fora al traviés de la so participación nel Conciertu pola Oficialidá o faciendo cantares a costafecha pa concienciar sobre la importancia de que l'asturianu algamara l'estatus xurídicu d'oficialidá.
Agora, a pocos díes de la manifestación pola oficialidá del 6 d'abril -con salida a les 18.00 de la Plaza de L'Humedal de Xixón- los artistes asturianos vuelven dar un pasu más ayudando a promocionar la convocatoria, dando cuenta de la so importancia histórica y llamando a la sociedá asturiana a sumase a la mesma. Y too esto al traviés del cantar 'Falando'.
El tema ta interpretáu por Lluci Palomares, voz de Corquiéu, y Xune Elipe, líder de Dixebra, con música de Sergio Tutu y Primi Abella. Trátase d'un tema interpretáu al 50% n'asturianu y gallego-asturianu qu'anima a la sociedá asturiana a siguir defendiendo'l so patrimoniu llingüísticu y usándolu. Pa la so difusión, 'Falando' tien un videoclip animáu realizáu por Javier Lueje que se va mover peles redes sociales.
Per otru llau, de forma paralela, va animase a músicos conocíos y a cualquiera que cante o toque un instrumentu a que graben un videu interpretando un fragmentu del cantar y depués llamando a la manifestación. Trátase d'una campaña abierta a tol mundu pa les redes sociales col hashtag #falando.
FALANDO
Voi nacer falando.
Voi morrer falando.
Voi vivir falando.
Voi siguir falando.
Vou nacer falando.
Vou morrer falando.
Vou vivir falando.
Vou seguir falando.
Nun me calla’l provincianu
qu’espatuxa nel teatru
cuando siente
l’asturianu.
Nun me cala el poderoso,
tampouco el intolerante.
Nun me cala el que desprecia
a lingua de mía madre.
Nun me calla’l señoritu
que se ri de lo que falo,
que namás oyó esta llingua
sintiendo a los sos criaos.
Nun me cala el columnista
qu’anuncia todos os males
el día qu’as nosas linguas
se fagan oficiales.
Voi nacer falando.
Voi morrer falando.
Voi vivir falando.
Voi siguir falando.
Vou nacer falando.
Vou morrer falando.
Vou vivir falando.
Vou seguir falando.