La XDLA reclama a TPA la puesta en marcha d'una programación infantil continuada n'asturianu
La Xunta pola Defensa de la Llingua Asturiana (XDLA) esixe a la dirección de RTPA la puesta en marcha d'una programación infantil nel nuestru idioma duradera nel tiempu. Amás, la organización reclama qu'estos conteníos se cubran col propiu presupuestu de RTPA.
Toles televisiones autonómiques de comunidaes con llingua propia diferente al castellanu dediquen una parte importante de la so programación a emitir una montonera de series y películes d'animación nes sos llingües. Nel casu de TPA, esta Selmana Santa ta emitiendo ocho capítulos del espaciu 'Animalada Xabaz', pagáu pola Conseyería de Cultura, que s'emiten nun horariu marxinal (9.45 hores) y en bloque cuatro díes siguíos.
Quier dicise, TPA va emitir nel 2021 menos de cuatro hores de programación infantil n'asturianu y estos conteníos nin salen del so propiu presupuestu. Nun tien xacíu que la Conseyería de Cultura dedique una partida pa una radiotelevisión que yá recibe 23 millones d'euros de dineru público al traviés de la Conseyería de Presidencia y que, según diz l'Estatutu, la Llei d'Usu y la so llei de creación, tien que ser una ferramienta p'ayudar a normalizar l'asturianu y el gallego-asturianu.
Por eso, la XDLA reclama a la RTPA qu'entame yá con una programación infantil propia, pero siguida nel tiempu, con producción asturiana y con doblaxes. Bien pue empezar cola grabación de capítulos nuevos d'Animala Xabaz, un programa que pa la organización cumple con tolos requisitos de la llei de creación de RTPA, como son el serviciu públicu, l'atención a la problación más mozo, la normalización de les llingües propies y la promoción de la cultura asturiana. Amás, un espaciu como esti ye una fonte d'empléu pa músicos y actores.
Per otru llau, la XDLA quier que rescample'l fechu de que la cadena va emitir esti sábadu y esti domingu nun horariu menos 'madrugador' (10.30 hores) películes infantiles con un doblaxe al castellanu fechu por empreses contrataes fuera d'Asturies. Quier dicise, TPA sí va dedicar el so presupuestu a ufrir los mesmos conteníos que van poder vese en televisiones como Clan, Boing, Neox o Cartoon Network, mentes que pa los conteníos n'asturianu dedica 0 euros.
Les comparances dexen a les clares la visión de la cultura y la llingua asturiana que tienen dende la dirección de RTPA y la necesidá d'un cambiu. Hai que recordar qu’ensin el papel activu de la RTPA ye imposible "salvar l’asturianu" y, muncho menos, eso que tanto repiten de “recuperar l'arguyu de ser asturianu”.