EL TOPU FARTÓN 2016
posted by xdla
on Vie, 02/09/2016 - 13:30
Como yá sabéis, la Xunta pola Defensa de la Llingua Asturiana forma parte del Llar Solidariu xunto a SOS Racismu Asturies y Xega. El Llar Solidariu ye un espaciu abiertu a tol mundu, plural, democráticu y autoxestionáu dende'l que defendemos valores d'igualdá, solidaridá, llibertá, xusticia y paz, que son tresversales a les nuestres organizaciones.
Pues bien, como cada añu (y van 33) los colectivos citaos montamos a lo llargo de toles Fiestes de San Mateo, n'Uviéu, el yá míticu chiringuitu El Topu Fartón. Prestábanos recordar la importancia que tien la presencia de la XDLA nuna de las fiestes asturianes que más xente atropa como exerciciu de visibilidá y normalización. Amás de los oxetivos de sensibilización social sobre la situación de la llingua asturiana y la necesidá d'algamar l'estatus d'oficialidá y unes polítiques normalizadores series que aseguren el futuru del idioma, El Topu Fartón tien tamién otra función, más prosaica si se quier, pero bien importante nestos tiempos pal desarollu de les campañes de les nuestres asociaciones. Tamos falando, evidentemente, de la financiación de munches actividaes y infraestructures que d'otra manera diba tar bien malo de mantener.
Anguaño les fiestes empiecen el vienres 16 de setiembre y acaben el domingu 25. De toles maneres, los preparativos empiecen el sábadu 10. El montaxe empecipia’l domingu 11 na Plaza del Conceyu d’Uviéu (por causa, en parte, de los cambeos fechos na Plaza de Riego tres la reforma del edificiu de la Universidá d’Uviéu -mobiliariu urbano nuevo, valláu y faroles qu’antes nun taben- y, per otru llau, la Plaza del Conceyu ye’l sitiu afayadizu pa respetar los protocolos de seguranza y víes d’evacuación). Los trabayos de preparación van siguir tola selmana hasta la tarde del vienres 16, momentos primero d'abrir.
El Topu Fartón va abrir al públicu’l vienres 16 tres la llectura del pregón (sobre les 20.30 hores) y hasta’l domingu 25 van dir faciéndose seis turnos diarios, cubriendo les 24 hores del día.
El desmontaxe faise de magar se zarra’l chiringu, la nueche del domingu 25. Cárgase’l camión na plaza y descárgase nel almacén yá’l llunes 26. Ye perimportante qu’haya muncha xente, sobre manera teniendo en cuenta que tol mundu va tar yá cansáu y qu'esi llunes ye día llaborable.
Si quies participar activamente n’El Topu Fartón unvia cuanto primero un corréu electrónicu a info@exunta.org pa recibir información detallada. Recuerda que toes y caúna de les persones que “trabayamos” n’El Topu facémoslo por activismu, de forma voluntaria y ensin contraprestación económica.
Documentos:
