Manifestación: ¡L'asturianu, llingua oficial!

Bien sabemos que la llucha polos derechos, la xusticia y la dignidá nun tien fin. Hai que recuperar los derechos perdíos, hai que caltener los que se tienen y hai qu’avanzar permanentemente na conquista de los derechos nuevos que son básicos.

Llevamos meses trazando d’esplorar y andar, pela primer vez na historia contemporánea d’Asturies, caminos nuevos qu'empobinen a una reforma del Estatutu d'Autonomía d’Asturies, a costafecha pa incluyir la oficialidá del asturianu. Ye’l momentu y hai la oportunidá, ye la primer vez que la Xunta Xeneral tien na mano aniciar un procesu de reforma ensin nengún de los partíos hasta agora mayoritarios.

Nesti Día de les Lletres de 2017 tamos en condiciones d'anunciar yá'l "Proyectu 2018 pa la Oficialidá". Tamos falando d’echar a andar na Xunta Xeneral una reforma estatutaria al traviés del Artículu 56.1. Pa eso, contamos col compromisu d'un grupu, ampliu y plural, de más d’una cuarta parte de los diputaos y diputaes. Y dende agora mesmo vamos ponenos a trabayar pa sumar a esti procesu una mayoría suficiente que permita zarrar la reforma en positivo, aprobando la oficialidá del asturianu.

Ye’l momentu de demostrar que’l futuru ye nuestru, que ta nes nuestres manes. El déficit democráticu que ta suponiendo la negación de los derechos llingüísticos de la ciudadanía asturiana a lo llargo de más de 30 años tien qu’acabar.

Esti vienres 5 de mayu a les siete y media na Estación del Norte d’Uviéu, nun pues faltar a la cita. L’asturianu, llingua oficial. ¡El futuru, nes nuestres manes!