Llei d'Usu: 20 años d'una llei incumplida y escosada

El 23 de marzu van cumplise 20 años de l'aprobación pola Xunta Xeneral de la Llei d'Usu y Promoción del Asturianu. Sicasí, dende la Xunta pola Defensa de la Llingua (XDLA) pensamos que nun ye tiempu de celebrar y falar de les bondaes d'esta norma de tenese desarrolláu, cosa que los socesivos gobiernos socialistes nun quixeron facer. Pensamos que ye tiempu de falar a les clares y dicir qu'esta norma ta escosada; qu'en dos décades demostróse a les clares qu'ensin oficialidá nun hai llei que-y valga al asturianu.

Nestos 20 años namás que se dieron dellos avances nel usu de la toponimía -la Llei d'Usu diz que los nomes tradicionales de los llugares d'Asturies han de ser los tradicionales-, pero namás d'una manera simbólica y por iniciativa de dalgunos conceyos, porque la mesma Alministración que los aprueba depués nun los utiliza, invisibilizándolos. Lo mesmo pasa na TPA, la televisión pública, que namás los utiliza dacuando y nos créitos, mentes que na RPA estos nun existen.

Y si falamos de los medios de comunicación públicos nun podemos dexar de reseñar que son el meyor exemplu d'incumplientu d'esta llei, que diz que l'asturianu tien que tener una presencia “amañosa”. Nun sabemos a quién-y pue parecer una presencia 'amañosa' un 3% de la emisión en TPA y 50 minutos a la selmana en RPA -existen radios privaes que tienen más minutos d'emisión nel nuestru idioma que la mesma radio pública, que, al igual que pasa cola televisión, incumple día tres día la Llei d'Usu ensin que'l Gobiernu o la Xunta Xeneral muevan un deu-.

Podemos falar tamién de como la llei obliga a la promoción de la industria cultural n'asturianu -lliteratura, música y audiovisual-, cuando'l presupuestu que se dedica a estos sectores amenorgóse dende 1998 hasta nun 75% o mesmo llegó desaparecer nel casu del audiovisual. Per otru llau, la ufierta educativa n'asturianu sigue ensin tar xeneralizada -na concertada cuasi nin existe- y cada añu a principios del cursu topámonos con escolinos a los que-yos ponen problemes pa exercer el so derechu a asistir a clase d'asturianu.

Y l'asturianu tampoco existe pa l'Alministración estatal y nes mesmes instituciones autonómiques munches veces existen problemes o reticencies pa los ciudadanos que, llibremente, quieren dirixise a l'alministración na so llingua -dalgo que permite la Llei-. Mesmamente, nos últimos meses tamos viendo como pela vía xudicial y a iniciativa del PP ta impidiéndose a dellos Conceyos desarrollar una política llingüística a nivel municipal, dalgo pa lo que según lo establecío pola Llei d'Usu tienen potestá.

Prueba de qu'esta norma ye agua pasada ye que son los mayores enemigos del asturianos los que dicen defendela. Ye'l presidente d'Asturies, Javier Fernández, y la presidenta del PP, Mercedes Fernández, les dos persones que más se-yos enllena la boca diciendo que l'asturianu ta mui bien como ta agora, cola Llei d'Usu.. Preciamente ye Javier Fernández el que dirixe un Gobiernu que nun cumple y desarrolla esta norma y precisamente ye Mercedes Fernández la que dirixe un partíu que ta atacando les posibilidades de desarrollu d'esta Llei, yá sía a nivel autonómicu o nos Conceyos. Asina, pasín a pasu cumplen col so oxetivu final de quitase'l problema d'enriba y de que la nuestra llingua muerra.

En definitiva, depués de 20 años d'incumplimientos, queda demostrao qu'ensin oficialidá nun hai Llei d'Usu que valga, que la oficialidá ye l'únicu marcu llegal qu'establez la Constitución española y que permite garantizar que los asturianos escueyan llibremente en que llingua vivir.

Nun hai nada que celebrar, son 20 años d'incumplimientos, 20 años perdidos.