La XDLA pide a la delegada del Gobiernu nueva que respete la llingua asturiana y l'autonomía municipal
La Xunta pola Defensa de la Llingua Asturiana (XDLA) quier felicitar a la delegada nueva del Gobiernu n'Asturies, Delia Losa, pol so nomamientu, al empar que-y solicita que ponga fin a los ataques que dende la entidá qu'agora va encabezar s'entamaron contra'l nuestru patrimoniu llingüísticu.
Foron ataques contra la llingua asturiana y contra l'autonomía de los conceyos, porque, con Gabino de Lorenzo actuando como executor de los prexuicios de dalgunos dirixentes del Partíu Popular, atacóse y recurrióse xudicialmente toles midíes qu'intentaron llevar alantre los conceyos pa normalizar l'usu del nuestru idioma.
A pesar de que la Llei d'Usu y Promoción del Asturianu (esa qu'agora tanto dicen defender los contrarios a la oficialidá anque enantes nun miraren pa ella) señala que los conceyos tienen potestá pa exercer la so propia política llingüística, Delegación de Gobiernu recurrió toles ordenances d'usu del asturianu y planes de normalización aprobaos por conceyos como Noreña, Carreño o Bimenes.
La XDLA espera que Delia Losa siga otru camín, el del respetu a l'autonomía municipal y a la llexislación llingüística asturiana. Nesi sentíu, como delegada del Gobiernu tien que principiar yá les xestiones necesaries pa que toles instituciones del Estáu respeten la toponimia asturiana oficial, tanto en señalizaciones como nel usu alministrativu.