Llamamos a derrotar esti domingu nes urnes a les posiciones contra la llingua asturiana
posted by xdla
on Xue, 23/05/2019 - 19:58
“Cada derechu que se gana faise a costa de los privilexos d’eses fuercies que se nieguen a cualquier avance democráticu”
La Xunta pola Defensa de la Llingua Asturiana (XDLA) quier facer un llamáu a la sociedá asturiana a participar masivamente esti domingu 26 de mayu nes elecciones autonómiques pa cola so papeleta nes urnes derrotar a aquellos partíos políticos que, con posiciones antidemocrátiques, muestren día a día l'odiu hacia la llingua asturiana.
Nestes elecciones van contraponese dos modelos d’entender la sociedá: l’abierta, la tolerante, la inclusiva, la plural, la qu’amplía derechos... frente la zarrada, la intolerante, la escluyente, la uniformizadora, la que recorta derechos. Esa visión curtia y restrictiva de los derechos ye la que primero negaba’l votu a les muyeres, la que depués se negó al divorciu, la que más tarde refugó’l derechu al albuertu, la que se manifestó contra’l matrimoniu ente persones del mesmu sexu, la que llama feminazis a les feministes...
La llucha pola oficialidá ye una llucha democrática, que reclama unes llibertaes ciudadanes qu’agora nun tenemos. Nun defender la oficialidá del asturianu en plenu añu 2019 supón tar en contra de l'aplicación de la Constitución española n'Asturies, qu'establez nel so artículu tres que, xunto al castellanu, les demás llingües españoles van ser oficiales nes sos comunidaes autónomes.
¿Si la oficialidá valió pa Galicia, Valencia o Navarra por qué nun val p'Asturies? ¿Equí puen facese escepciones? ¿Tán diciendo que somos ciudadanos de segunda o que la nuestra llingua ye de segunda? ¿Por qué nun tán tamién en contra de la oficialidá nos territorios que yá la tienen? ¿Será que desque s'aprobó allí naide vio la necesidá de dar un pasu atrás?
Hailos que lleguen a dicir que tán en contra de la oficialidá, pero a favor del asturianu. ¿Pue tase a favor d'una llingua y al mesmu tiempu nega-y los derechos que tienen les demás ? Mesmamente, hailos qu'alerten de la hecatombe económica que podría suponer declarar l'asturianu llingua oficial. ¿Supunxo dalgo bono p'Asturies la falta d'oficialidá? ¿La economía asturiana ta meyor que la gallega pola falta d'oficialidá? ¿Hai más trabayu equí porque l'asturianu nun ye oficial? ¿Hai menos emigración de la mocedá porque'l nuestru idioma nun tien les mesmes condiciones que'l castellanu? ¿Lleguen enantes les infraestructures y salen más aviones del aeropuertu porque se pierda l'asturianu?
La historia enséñanos que derromper cada espaciu de llibertaes lleva muncha xera. Y que cada derechu que se gana faise a costa de los privilexos d’eses fuercies que se nieguen a cualquier avance democráticu. Por eso esti domingu hai qu'enllenar les urnes de votos a favor d'una Asturies más xusta y más democrática, que mire hacia'l futuru pero ensin escaecer el so pasáu. Ta nes manes de toles asturianes y asturianos.
Documentos:
