La Xunta pola Defensa de la Llingua Asturiana llama a una movilización masiva pola oficialidá
posted by xdla
on Mié, 08/09/2021 - 16:32
Ente l’anunciu fechu esta mañana pol presidente Adrián Barbón sobre l’apertura de la reforma del Estatutu d’Autonomía, que necesariamente va incluyír la oficialidá de la llingua asturiana y del gallego-asturianu, la Xunta pola Defensa de la Llingua Asturiana llama a tola sociedá d’Asturies a participar el sábadu 16 d’ochobre a les 12:00 h, dende la estación del Norte d’Uviéu, nuna manifestación que pue ser histórica.
Ye la primer vez que vamos salir a la cai a animar una iniciativa del Gobiernu asturianu que va cuntar cola gran mayoría de diputaos y diputaes de la Xunta Xeneral y que va poner puntu final a la marxinación de los derechos llingüísticos n’Asturies.
Tamién vamos salir a la cai pa llamar a la reflexón a la minoría parllamentaria qu’entá s’opón al reconocimientu de la oficialidá. Nun se sostién más tiempu que n’Asturies se siga refugando lo que respalden nos demás territorios del Estáu con otra llingua propia. Llegó’l momentu nel que van tener que decidir si quieren sumase a la protección del patrimoniu llingüísticu d’Asturies o si quieren quedar retrataos na historia como los últimos reaccionarios qu’intentaron desanicialu.
La reforma del Estatutu entama agora y tien qu’acabar llueu. Esti procesu nun pue siguir allargándose más tiempu. Por eso, facemos un llamáu a tola sociedá civil d’Asturies, a toles organizaciones sociales, culturales, sindicales, polítiques y de cualquier clas, a tolos asturianos y asturianes, a sumase a esta convocatoria qu’entamamos col enfotu de que seya la última manifestación pola oficialidá.
¡Llegó la hora!
¡Asturianu y gallego-asturianu, llingües oficiales yá!