La XDLA reclama la incorporación del asturianu a les audioguíes del Conventín de Valdediós
posted by xdla
on Vie, 16/12/2022 - 19:00
Pa la XDLA, ye ablucante qu'un espaciu dependiente del Principáu, y más en concreto de la Conseyería de Cultura, Política Llingüística y Turismu, dexe de llau'l nuestru idioma. Esti mesmu xueves, la conseyera Berta Piñán afirmaba na Xunta Xeneral que l'Executivu autonómicu tenía una estratexa turística y recursos pa ponela en marcha. Paez que, nesti casu, dientro d'esa estratexa turística nun tenía espaciu'l nuestru patrimoniu llingüísticu.
Dellos estudios recomienden l'usu de la llingua propia como ferramienta de diferenciación nes iniciatives turístiques. Por eso, la organización reclama la incorporación del asturianu en toles audioguíes disponibles, amás de na cartelería y nos cartafueyos informativos, de los equipamientos culturales dependientes de la Conseyería de Cultura, Política Llingüística y Turismu.
Casos como'l d'esta audioguía son exemplos de la situación de precariedá que vive'l nuestru idioma y de lo necesario d'una política de normalización llingüística sistemática y ambiciosa, qu'otra vuelta ye evidente que, más allá de palabres guapes, sigue faltando.