Artículu de la XDLA del Día de les Lletres

Esti Día de les Lletres del 2012 vamos volver a reivindicar nes cais l'estatus d'oficialidá pa la llingua asturiana y el desarrollu d'una política llingüística amañosa que faiga posible que l'idioma sobreviva pa les xeneraciones futures. Nos tiempos dificiles ye cuando más hai qu'amosar el compromisu y la ilusión con un proyectu que nos va definir siempre como comunidá.

La crisis económica, amás d’afectar al bolsu y a los puestos de trabayu de la mayoría de la población, ta repercutiendo gravemente na industria pequeña qu’usa l’asturianu y cree nello. Que ciarraren toles llibreríes especializaes o que desapaeciere l'únicu periodicu que tenía como llingua vehicular l’asturianu son una prueba clara. Amás d’esto, los recortes que tán realizando les Alministraciones tán cebándose cola cultura. Nel casu del asturianu, con un presupuestu yá de por sí probetayu, la mengua de les subvenciones podría repercutir mui negativamente nel sector editorial y musical nel nuestru idioma, que nun puen sobrevivir ensin una política d'apoyu públicu. Amás, la desapaición de les partíes destinaes al sector priváu y a les entidaes locales afectaría negativamente na concepción social del idioma como una llingua válida pa tolos ámbitos.

Otra manera, amás de los efectos de la crisis, a la situación de la llingua propia d’Asturies hai que sumar que’l Gobiernu autonómicu sigue ensin cumplir cola Llei d’Usu y Promoción, que, anque curtia, ye la llexislación llingüística qu'hai. La recuperación de la toponimia, que diba a pasu lentu, nun vio nesta última llexislatura nengún espediente aprobáu y la propia Alministración nun usa les formes oficiales. El porcentaxe d’emisión n’asturianu na RTPA nun llega nin al 2%. Otra manera, nel campu de la educación, les circunstancies yá conocíes de precariedá de l'asignatura tán faciendo que l’asturianu siga en situación de marxinación en toles etapes imposibilitando l'aprendimientu del idioma poles nueves xeneraciones y dexando la tresmisión xeneracional nuna situación dramática. Nada se sabe tampoco de la Especilidá de Llingua Asturiana nin de les esperiencies pilotu col asturianu como idioma vehicular.

Sicasí, como vieno faciendo a lo llargo de les últimes décades y a pesar de los tiempos complicaos nos que vivimos, el movimientu de reivindicación llingüística va siguir esixendo lo que ye de xusticia, sabedor de que la mayoría de los problemas mentaos enantes podríen solucionase col reconocimientu de los nuestros derechos llingüísticos. Y sabedores amás de que les comunidaes autónomes con más puxu económicu son aquelles con llingua oficial y que’l fomentu del nuestru idioma y cultura podría ser una gran fonte de puestos de trabayu, dalgo bien necesario nestos tiempos.

Ta malo de facese oyer falando de derechos llingüísticos cuando recorten los más básicos de subsistencia y de serviciu públicu, pero la defensa del nuestru idioma ta perriba de circunstancies coxunturales, por mui abegoses que seyan, porque tamos nuna carrera contra reló contra'l desaniciu. Mentes quedemos xente lleal a la llingua qu'aprendiemos en casa y mentes sigamos lluchando por que la falen los nuestros fíos, hai onde s'enfotar. Nesti Día de les Lletres, un símbolu pa la nuestra reivindicación, vamos demostralo.