RTPA, instrumentu d'una FSA vieya pa incumplir una llei d'usu que yá nun val

Los programes n'asturianu -y nun val como programa n'asturianu dicir un 'ye' y un 'prestoso' nun discursu en castellanu- tán baxo mínimos, nes cifres más baxes de magar empezó a emitir. Namás val con mirar la parrilla de programación pa comprobalo y ver que TPA nun ta cumpliendo col so mandáu llexislativu -Estatutu, Llei d'Usu y Llei de RTPA-, que diz que l'asturianu na radiotelevisión pública tien que tener una presencia amañosa.

Y ye que la televisión asturiana, al contrario de lo que manda la llexislación, exerce una discriminación hacia la llingua asturiana. Por poner namás un exemplu ente los munchos qu'hai tolos díes, nuna fecha tan simbólica como'l Día de les Lletres Asturianes, na primer canal de TPA programaron una película doblada al castellanu. Mentanto, una hora más tarde, la segunda canal programa la mesma película doblada al asturianu. Esto, amás de suponer que na cadena tienen programadores poco espiertos que nun entienden que l'audiencia va buscar lo que nun ve n'otros canales -nesti casu una película n'asturianu-, ye un exemplu claru de marxinación y de la idea que tienen los responsables de los medios públicos de priorizar la versión castellana sobre l'asturiana (que se fixera a costafecha pa emitila en TPA).

Per otru llau, l'usu de la toponimia oficial sigue incumpliéndose día a día y la RPA sigue asemeyándose a una radio local de Madrid, ensin presencia nenguna -quitando 10 minutos de llunes a vienres- del nuestru idioma. Mesmamente, la emisora pública nin emite música nel nuestru idioma fuera de la Selmana de les Lletres. Esta desconexón cola realidá cultural asturiana fai que güei RPA sía la radio xeneralista con menos oyentes n'Asturies.

La TPA, quitando poques escepciones que son gotines nuna programación mayoritaria en castellanu -o nun castellanu con interferencies n'asturianu-, sigue marcada pola diglosía y por programes de baxa calidá qu'imiten los programes de les televisiones estatales. Una situación que fai que la sociedá asturiana dea cada día'l llombu a la que tendría que ser la so televisión, que tamién ye la televisión xeneralista con menos espectadores n'Asturies.

Los asturianos nun conecten con RTPA, que, al revés que les demás emisores autonómiques, nun ye referente informativu pa la ciudadanía, nin ferramienta pal sector audiovisual, nin muncho menos un preséu pa la promoción del asturianu. Asina, la radio y la televisión pública incumplen cada día una Llei d'Usu que ta demostrando que nun val.

Y ye que la FSA vieya, la de Javier Fernández y Guillermo Martínez, y el director de RTPA, Antonio Virgili, mantienen la cadena secuestrada. Ye'l so güertu particular, non la radiotelevisión de tolos asturianos.

Esperamos un cambiu na política de programación pa que la desconexón qu'existe ente la RTPA y la sociedá asturiana nun faiga que los medios públicos tengan, igual que l'Executivu de Javier Fernández, los díes cuntaos.