RECONOCIMIENTU A LA XDLA

Bonos díes a toos y toes, gracies pola asistencia y munches gracies a La Estaya de la Memoria L'Altu Nalón por alcordarse de nosotres.

L’añu que vien, la nuestra organización, la Xunta pola Defensa de la Llingua Asturiana fai cuarenta años. Cuarenta años de llucha por una aspiración democrática: que naide tenga menos derechos que naide dependiendo d’en qué llingua fale.

Cuarenta años de trabayu militante, voluntariu, sabedores de que tamos trabayando por una causa xusta, pero les más de les veces cola indiferencia de la clas política y cola belixerancia en contra del poder mediáticu.

Seguro qu’a les lluchadores pola memoria democrática esto tien que vos sonar: derechos democráticos, trabayu militante, causa xusta, indiferencia d’unos, belixerancia d’otros...

Por eso, na Xunta pola Defensa de la Llingua Asturiana préstanos sobre manera esti reconocimientu que nos facéis, porque sabemos que somos organizaciones con muncho en común. Tamos viendo cómo los de la intolerancia, los del odiu, los fascistes, nun faen distingos. Ellí onde garren poder lo primero que faen en tolos llaos ye derogar les Lleis de Memoria Democrática….y torgar, reprimir y arrequexar les llingües propies nes sos Comunidaes.

La llucha pola memoria democrática, pola alcordanza de les víctimes de la intolerancia, tien una proyección clara nel presente y nel futuru porque reclama p’agora y pa siempre los mesmos valores de xusticia y derechos polos que lluchó aquella xente. Tamién la memoria, l’alcordanza de la xente que nos precedió, marca’l camín de quien lluchamos pola supervivencia del asturianu. Defendemos una llingua que namás pue sobrevivir si nun se corta la cadena que la tresmite de padres y madres a fíos y fíes, de güeles y güelos a nietos y nietes. El pasáu proyéctase nel presente y nel futuru nes palabres vives d’un pueblu. La nuestra llingua namás sobrevive si-y garantizamos unes condiciones sociales afayadices pa que tenga presente y pa que tenga futuru.

La Xunta pola Defensa de la Llingua Asturiana va siguir trabayando como lo fixo nestes décades. Reconocimientos como’l de güei anímennos a siguir con más fuercia.

Munches gracies.