Yolanda González Huergo, Yoli, la nuestra compañera, acaba de dexanos. Son tantos años viéndonos, falando, organizando actividaes, militando xuntos y calteniendo viva la reivindicación llingüística... que se nos fai imposible pensar n'entamar nada ensin tenela a ella ehí, cola so implicación y la so capacidá de trabayu.
Los sos munchos compromisos políticos y sociales nunca la desvincularon de la Xunta pola Defensa de la Llingua Asturiana. En conceyos, en manifestaciones, en conciertos, nos Premios Andrés Solar... siempre taba Yoli, cola so sonrisa y la so voz allegre.
Yoli, nun va ser lo mesmo ensin ti, pero cuando volvamos a la xera vamos tener mui presente na nuestra alcordanza'l to exemplu. Pues tar segura de qu'esi futuru nel que creyíes y pol que tanto lluchasti va llegar.
