Noticies

La XDLA denuncia la intención de la dirección de RTPA de firmar un alcuerdu por valor de dos millones d'euros con Warner

Pay
02
warner

El proyectu, que nun va xenerar nengún beneficiu pal audiovisual asturianu, demuestra la falta de compromisu llingüísticu de los xestores actuales

Posted By xdla lleer más

La XDLA pide al Conceyu d'Uviéu que retire la subvención a la Cátedra Alarcos y a la Universidá que tome midíes

Och
30
torrentealarcos

La Xunta pola Defensa de la Llingua Asturiana (XDLA) quier espresar la so condena más firme a les declaraciones llamentables y deliriantes feches por Miguel Alarcos nel marcu de la cátedra que lleva’l nome de so padre y que preside so madre.

Trátase d’un ataque que da vergüenza ayena y que ye más grave tovía al venir d’un miembru de la comunidá universitaria. La Universidá d’Uviéu, institución encargada y pagada pa curiar la cultura asturiana, tien que refugar dafechu esti tipu de comportamientos ente’l so profesoráu. Ye indignante pensar que nes sos facultaes habiten personaxes que faen escarniu públicu de manera irracional y acientifica de los derechos de les persones a usar la so propia llingua en cualquier circunstancia y que desprecien a compañeros investigadores qu'estudien la llingua asturiana. Esperamos, por eso, que la Universidá tome les midíes necesaries pa evitar d’una vez estes agresiones.

De la mesma manera, solicitamos al Conceyu d’Uviéu la retirada de tou fondu públicu a la cátedra mentada al nun respetar los derechos de les persones falantes d’asturianu recoyida la llexislación vixente nin el patrimoniu llingüísticu d'Asturies. Nun se pue consentir gastar dineru público pa patrocinar entidaes que discriminen sistemáticamente a una parte importante de la sociedá asturiana.

Posted By xdla lleer más

La XDLA vuelve solicitar a RTPA'l doblaxe de les películes d'Astérix al nuestru idioma

Och
22
papiru

La midida valdría pa visibilizar los alcuerdos parllamentarios sobre l'asturianu y el cumplimientu de los mesmos polos xestores del mediu públicu

Posted By xdla lleer más

El Plan de “dignificación” y la inconcreción nuna ferramienta básica: RTPA

Och
21
Tpa

Les midíes puen quedar en nada ensin una dirección xeneral de RTPA comprometida colos derechos llingüísticos

Posted By xdla lleer más

L'audiencia de los programes n'asturianu confirma la necesidá d'un cambiu na dirección de RTPA

Och
16
Alzada

La XDLA recuerda a los grupos parllamentarios que ye imprescindible tener un director xeneral favorable a los derechos llingüísticos

Acabante empezar la recta final pa la designación del director xeneral de RTPA, la Xunta pola Defensa de la Llingua Asturiana (XDLA) quier destacar los resultaos d'audiencia escelentes del programa n'asturianu L'Alzada, estrenáu esti martes 13 d'ochobre y que llegó a doblar la media d'audiencia de la cadena. Y ye que, mentes la media d'anguaño de TPA nun llega al 6% -quedando perbaxo de Cuatro y LaSexta-, esti programa algamó un 10,5% de share y 48.000 espectadores n'horariu de máxima audiencia, dalgo que lu convirtió nel espaciu que más asturianos axuntó énte la pantalla de TPA nesi día -anque en share (el porcentaxe de xente delantre de la televisión nun momentu concretu) superólu l'informativu del mediudía y la película de vaqueros de la tarde-. Estos resultaos muestren la necesidá d'un cambiu al frente de la dirección de la radiotelevisión pública, porque nestos años pudimos ver que mentes l'equipu de dirección va per un llau, la sociedá asturiana -que tien apegu al so territoriu y a la so cultura- va per otru.

Por too esto, la XDLA recuerda a los grupos parllamentarios que ye imprescindible cuntar con un director xeneral comprometíu cola cultura asturiana y que nun se niegue a desarrollar la llexislación vixente -Estatutu, Llei d'Usu y Llei de RTPA, testos que reconocen el papel de la radiotelevisión pública nel procesu de recuperación del patrimoniu llingüísticu del país-. Hasta'l momentu vimos una directiva que nun quixo normalizar l'usu del idioma na programación y que namás lu arrequexó pa los usos humorísticos y diglósicos, ensin nengún procuru pa cola so corrección y calidá. Mesmamente, nun s'emitió programación infantil n'asturianu -porque dos series en diez años nun ye emitir programación infantil n'asturianu, ye una anécdota ensin continuidá-, a pesar de que nel restu de territorios estes emisiones foron el meyor complementu pa la presencia del idioma nes escueles. Ye'l momentu de que los partíos muestren el so compromisu col idioma propiu, porque namás una RTPA onde l'usu del asturianu y del gallego-asturianu sía dalgo normal -sumao a una presencia digna del idioma en toles etapes educatives- va poder poner frenu al alarmante retrocesu de falantes que viven les llingües tradicionales d'Asturies.

Posted By xdla lleer más

Cursu d'asturianu en Lluanco

Set
25
Lluanco

Cursu d'asturianu en Lluanco
-Nivel: Aniciu
-Sitiu: Casa La Escribana (Cai Suárez Inclán 5) Lluanco
-Profesor: Xurde Fernández
-Duración: 30 hores.
-Entamu: martes 13 d'ochobre 2015
-Matrícula: 20€ (matrícula+tol material necesariu incluíu)
-P'apuntase y info: info@exunta.org //tel.679650998

Posted By xdla lleer más

La XDLA afirma que'l consensu políticu cola RTPA tien que s'algamar al traviés del asturianu

Set
23
rtpa

La Xunta pola Defensa de la Llingua Asturiana (XDLA) quier destacar que ye fundamental la renovación del Conseyu d'Alministración de RTPA y el cambiu na dirección de la empresa pública, porque la directiva actual negóse a cumplir cola llexislación vixente en materia llingüística. Asina, destacó una programación onde l'asturianu tuvo baxo mínimos y acutao a delles temátiques, mentes qu'hubo bien d'espacios que presentaron una imaxe diglósica y non normativizada de la nuestra realidá llingüística. Agora ye'l momentu de que los grupos parllamentarios sumen fuercies pa cambiar la situación y nomar unos xestores comprometíos col audiovisual d'esta tierra, cola cultura propia y col patrimoniu llingüísticu asturianu. Ye de reseñar qu'esti consensu namás pue venir al traviés del apueste por una RTPA onde l'asturianu tenga un usu normal.

Posted By xdla lleer más

Discriminen a la Cooperativa El Nocéu por usar l'asturianu‏

Set
18
ElNocéu

De siguío, trescribimos el comunicáu de la Cooperativa El Nocéu nel que se denuncia la discriminación pol usar l'asturianu nos trámites cola Tesorería Xeneral de la Seguridá Social. Dende la Xunta pola Defensa de la Llingua Asturiana ufiertámos-yos tol nuestru apoyu pa iguar esta situación. Del mesmu xeitu, aprovechamos pa reclamar una vez más la oficialidá, como única manera d'asegurar un mínimu respetu a los derechos de les persones falantes d'asturianu.

Comunicáu de discriminación llingüística d’El Nocéu

Dende la Cooperativa El Nocéu queremos denunciar públicamente la situación de discriminación llingüística que sufrimos énte la Tesorería Xeneral de la Seguridá Social, dependiente del Ministeriu de Trabayu y Seguridá Social, al nun ser almitíos los nuestros estatutos por tar redactaos n’asturianu, siendo obligaes a presentalos en castellanu.
Al intentar danos d’alta como trabayadores de la cooperativa, atopámonos cola imposibilidá de facer cualesquier xestión cola almistración estatal na nuestra llingua propia, empleando na so argumentación l’artículu 4 del capítulu II de la Llei d’Usu y Promoción del Asturianu nel que se llimita l’usu d’esti idioma a l’alministración autonómica.

Nuna segunda instancia, na qu’una trabayadora d’esti organismu debía recurrir a los estatutos pa resolver una cuestión llaboral, ésta nun quixo nin garralos pol fechu de tar escritos n’asturianu.
Ye por esto que demandamos que se revierta esta situación de discriminación continua. Les persones qu’optamos por usar el nuestru idioma a la hora d’espresanos, de forma oral o escrita, nun podemos siguir marxinaes d’esta forma tan inxusta. Queremos dexar de ser persones de segunda a los güeyos de los poderes que siguen reprimiéndonos una y otra vez, cuando lo únicu que pidimos ye que se respeten los nuestros derechos básicos, la llibertá de poder espresanos na nuestra llingua.
Asina ye que l’únicu marcu que puede garantizar los derechos llingüísticos básicos de les persones asturfalantes ye la oficialidá del asturianu.
Sariegu, llunes, 14 de setiembre del 2015.

Cooperativa El Nocéu

Posted By xdla lleer más

La XDLA pide persones comprometíes colos derechos llingüísticos na dirección de la RTPA

Set
16
rtpalletres

Énte la negociación inminente pa designar los xestores de la RTPA, la Xunta pola Defensa de la Llingua Asturiana (XDLA) recuerda a los grupos políticos que'l parllamentu salíu de les elecciones pasaes escoyó a Javier Fernández presidente cola condición, ente otres, de "incrementar la presencia de la llingua y la cultura asturianes" na radiotelevisión pública. Pa garantizar la execución d'esti compromisu parllamentariu, la XDLA demanda que los futuros xestores de la RTPA -director xeneral, Conseyu d'Alministración y Conseyu de Comunicación- sían persones comprometíes colos derechos llingüísticos. La organización cívica fai un llamamentu espresu a les formaciones polítiques qu'apostaron nos sos programes electorales por una RTPA al serviciu de la normalización llingüística -Podemos, IX y Foru- pa que trabayen con esti oxetivu.

Posted By xdla lleer más

Actividaes #ElTopuFartón2015

Set
15
topu'15

Actividaes del Chiringuitu El Topu Fartón 2015 (Chigre de Xega, Xunta pola Defensa de la Llingua Asturiana y SOS Racismu), na plaza del ayuntamientu d'Uviéu a lo llargo de les fiestes de San Mateo

Llunes 14, 13.00 hores; Presentación del llibru “Pasiando per Uviéu”, d'Esther Prieto y Samuel Castro (Ediciones Trabe)

Martes 15, 18.00 hores: Charla “BDS, un compromisu solidariu”, del Comité Solidaridá Causa Árabe.

Miércoles 16, 13.00 hores: Fomentu del cooperativismu y sidra n'asturianu. Sidra La Llume.

Miércoles 16, 19.00 hores: Presentación del informe añal de SOS Racismu con participación y esposición d'Amnistia Internacional.

Xueves 17, 19.00 hores: Taller de Taichi.

Vienres 18, 18.00 hores: Charla “Palestina, una mirada dende Asturies”, del Comité Solidaridá Causa Árabe

Vienres 18, 19.30 hores: Clase de baille tradicional col Grupu San Félix de Candás.

Sábadu 19, 12.30 hores: Cantarinos de chigre con “El coriquín La Pega”.

Sábadu 19, a lo llargo de tol día: Feria del Llibru y Discu Asturianu.

Posted By xdla lleer más

Páxines